2Sa 1 | ZomZIV | STEP | Saul sih khitin Amalek-te a zawhna pan David ciah kik-a, Ziklag ah ni nih a tam hi.

2 Samuel 1

David in Saul Sihna Za

1 Saul sih khitin Amalek-te a zawhna pan David ciah kik-a, Ziklag ah ni nih a tam hi. 2 A ni thum ni-in Saul giahphual panin mi khat tunga a puan kikekin a lutungah leivui a baang hi. David kiang a tun ciangin a zahtakna-in lei-ah a puksuk hi. ^a

3 David in, “Koi pana hong paikhia na hi hiam?” ci-in a dong hi.

Amah in “Israel-te giahphual pana suakta ka hi hi,” ci-in a dawng hi.

4 David in, “Bang piang hiam? Hong gen dih in,” ci-in a dong hi.

Amah in, “Giahphual panin mite tai uh hi. Amaute tampitak si uh hi. Saul le a tapa Jonathan zong si hi,” a ci hi.

5 Tua ciangin amah thu a zasak tangvalpa kiangah, “Saul le a tapa Jonathan sihna bangci theih na hi hiam?” a ci hi.

6 Tangvalpa in, “Kei Gilboa Vum ah ka na om kha a, tua lai ah Saul a teipi tungah a kingam hi. Sakol-lengte le a tunga tuangte inlah neh mahmah ta uh hi. 7 Amah hong kihei-a kei hong muh ciangin hong sama, “Bang kong hihsak dia?” ka ci hi. ^b

8 Amah in, “Kua na hiam?” hong ci hi.

“‘Amalek-te khat ka hi hi,’ ci-in ka dawng hi.

9 “Tua ciangin kei kiangah, ‘Ka tungah dingin hong that mai ve! Sihna khopin liam napi, ka naanglai hi,’ hong ci hi.

10 “Tua ciangin a tungah dingin ka that hi, bang hang hiam cih leh a tuk khit ciangin nungta zo nawn lo ding cih ka thei hi. Tuateh a lutunga a kumpi lukhu le a bana banbulh ka la-a, tuate hih lai-ah ka topa kong puak hi,” a ci hi. ^c

11 Tua ciangin David le amah tawh a omkhawmte khempeuh in a puan uh manin a balkek uh hi. 12 Amaute Saul le a tapa Jonathan, le TOPA galkapte le Israel innkuante adingin thumin kap uh a, nitak dong an a tang uh hi, bang hang hiam cih leh amaute namsau in a puk khin uh hi. ^d

13 David in thupuak tangvalpa kiangah, “Nang koi pan na hiam?” a ci hi.

“Kei Amalek-te pemta khat tapa ka hi hi,” ci-in a dawng hi.

14 David in, “Bang hangin TOPA sathau nilhsa khat siasak dingin na khut liik na hiam, lau lo na hi hiam?” ci-in a dong hi.

15 Tua ciangin David in a mite khat sama, “Pai-in amah sattuk in!” a ci hi. Tua ciangin amah in tuapa sattuk-a a si hi. 16 Ahang in, David in tuapa kiangah, “Nangma sisan nang lutungah a tu hi. Nangma kamin, ‘TOPA’ sathau nilhpa ka that hi,’ na cih ciangin nangma kam in nang langah teci a pang hi,” a ci hi.

Saul le Jonathan tungah David Tamlawhna

17 Saul le a tapa Jonathan tawh kisai-in David tamlo a, 18 Judah mite in (Jashar Laibu sunga kigelh) hih thal tamlawhna a kihilh dingun thu a pia hi: ^e

19 “Israel aw, na minthanna na munsangte tungah kithat tah.
A thahatte bangci puk a hia!
20 “Gath ah gen loin Ashkelon ^f
kongzingte ah zong tangko kei in,
tua ahi kei leh Philistia tanute nuam kha ding uh a,
vun-at loh tanute lungdam kha ding uh hi.
21 “Gilboa mualliante aw, ^g
no tungah guah le daitui kia loin
lote in zong biakna-a dingin an gah kei hen. ^h
Ahang in, tua lai-ah a thahatte lum nin ta a,
Saul’ lum lah sathau a kizut nawn kei hi. ⁱ
22 A kithatte sisan pan le
a thahatte satak panin,
Jonathan’ thal guak kik ngei lo-a,
Saul namsau guaksuak ngei lo hi.
23 “Saul le Jonathan a hin lai-un
ki-it in ngaihhuai uh a,
a sih hunun a kikhen kei uh hi.
Muvanlaite sangin manlangzaw uh a,
humpinelkaite sangin thahatzaw uh hi. ^j
24 “Israel tanute aw,
note puan sannel dikdek hong silhsakpa,
na puansilhte uh khama
hong zepsakpa Saul kah un.
25 “Bangci a, thahatpa galphualah tuk tazen hiam!
Note bosang tungah Jonathan kithatin lum hi.
26 Ka sanggampa Jonathan aw, nang hangin ka dah hi; ^k
nang kong it mahmah hi.
Kei nong itna lamdanga,
numeite itna sangin lamdang zaw hi. ^l
27 “A thahatte bangci-a tuk mawk a!
Galsimna galvante mangthang tah ei!” a ci hi.